睇電視播體育新聞，一場香港甲組足球聯賽，屯門對橫濱FC，一位白衫球員（屯門隊）迎接開出角球，飛身向前，一頂入網，好波也，幾乎拍爛手掌，只是睇真啲畫面，係藍衫球員（橫濱FC）開角球噃，白衫球員頂頭槌入波，即係擺烏龍啦，但擺烏龍多數係無心之失，例如最近英超曼城隊長金賓尼擺烏龍，係在禁區內左腳解圍，竟然撻Q射波入自己龍門之類，但呢位屯門球員似乎係好有意識，似足對方前鋒咁勇猛，迎頂角球入網嘅噃，一啲都唔似係無心擺烏龍，奇怪也。
哦，足總原來宣佈要調查，呢位白衫球員，屯門嘅後衞李明（內地人）是否打假波，故意在補時階段「絕殺屯門」，等橫濱FC贏咗二比一。調查未有結果之前，疑點利益歸於當事人，唔好講住，不過純粹從錄影片段嚟睇，表面上確有值得李明解釋之處。同時又有報道指，內地賭波居然賭埋港甲，賭注有時高達一百萬元一場，咁又另有角度了。
賭波咁多盤口，點會有人賭埋觀眾得小貓三四隻嘅香港波，真係木宰羊。左丁山有時都賭吓波嘅，但只限於自己比較熟悉同埋相信乾淨程度係最高嘅英超聯，德甲間中落吓注，意甲西甲就咪搞咯，南歐國家不時有不尋常新聞爆出嚟，制唔過。意大利著名中場球員加杜素最近咪捲入假波風雲囉。一次去茶樓飲茶，聽到一班企堂講賭波，居然連日本乙組波都賭埋，仲講到似層層㖭，既佩服佢哋知識廣博，亦替佢哋荷包牙煙，賭日本乙組，冇乜把握買得中呀，你估買曼城主場對任何一隊咩？講起賭波，馬會嘅1885專線電話識得趕客，打親去1885都自動轉去1886，要按1字2字咁嘅麻煩嘢，冇人聽電話嘅，唔通馬會唔再請兼職聽電話？試過幾次都係咁，左丁山都落唔到注，索性慳番。馬會在沙田馬場興建科技中心，明年應可落成，屆時全部電話接線生可以搬晒去一個更舒適環境工作，唔會到時又叫投注者按1按2按3呀？