利物浦強勢以榜首姿態過聖誕，不過喺周四「拆禮物日」大戰作客曼城就以1:2落敗，一輪賽事之後就由第1跌到第4，真係聖誕快「落」。紅軍呢場波其實輸得幾有爭議性，上半場史達寧單刀過埋龍門但被誤判越位；係就係唔抵，不過利物浦喺下半場仲有好多埋門機會，一個都把握唔到又怨得邊個呢。
單刀慘被誤判越位
開波19分鐘紅軍前鋒蘇亞雷斯交球靚直線畀史達寧，過埋赫特之後被判越位在先吹停；不過從慢鏡頭睇番，史達寧起碼同企最後嘅高拉洛夫相差兩個身位，認真無辜。不過，紅軍喺5分鐘後始終係先開紀錄嘅一隊，又係阿蘇交靚波，史達寧接應過埋赫特，但畀隊友菲臘比古天奴搶先一步後上射入。曼城喺完半場前大反擊，中堅高柏尼先喺31分鐘接應角球頂入扳平，到補時階段一次反擊由尼格度反超前，紅軍門將米洛列特判斷失誤，拍到個波照入。
到下半場利物浦傾巢反擊，不過門前把握力始終爭啲，進攻上靠晒阿蘇，射又係佢、傳又係佢，可惜喺曼城後防有險象但冇入波，佐敦軒達臣同格連莊臣都喺門前失機；最黃金一次機會由史達寧糟蹋，喺73分鐘阿蘇左路精準傳中，呢位翼鋒面對個龍門，點知射門一飛沖天
羅渣士：向曼系球證說不
紅軍輸畀曼城之後就一跌跌落積分榜第4名，領隊羅渣士賽後好唔順氣話：「旁證喺誤判越位嗰陣根本跟唔上位置，而蘇亞雷斯亦經常受到尼史葛侵犯，但球證冇吹罰。希望下一次利物浦對曼市嘅比賽，唔好再由『大曼徹斯特球證』（Greater Manchester referee）執法。」羅渣士諷刺嚟自保頓嘅球證李爾美臣坦護大曼徹斯特郡球隊，足總亦已調查，隨時秋後算賬處分。不過從數據睇，美臣之前4次執法曼城嘅比賽，其實藍月亮一場都未贏過。
紅軍要即刻收拾心情，因為到咗下星期日又有大戰要打，作客出戰車路士。車路士喺拆禮物日主場1:0小勝史雲斯，不過車仔中場主力拉美利斯喺場波領黃牌，會喺下周日大戰停賽。
足本收睇《亂噏24》x劉嘉玲； 鄭秀文@杜琪峯再度登場！
周一至周五《亂噏24》約定你： http://bit.ly/appletalk24