【大坑】現年44歲嘅張可頤聖誕約咗朋友喺大坑開餐，呢晚佢連走兩場，先喺意大利餐廳食薄餅嘆西餐，之後再轉場去擦蟹食中菜，估唔到身材纖瘦嘅可頤食力驚人，可以一口氣連食兩場，佢仲不停擺相上微博，真係食得好盡興。
記者發現可頤嘅座駕泊喺咪錶位，本來8點夠鐘，但可頤都冇出現入咪錶，好在冇警察抄牌，可頤唔使食「牛肉乾」，直至9點半，可頤先行過嚟入多半粒鐘咪錶，然後返上餐廳繼續食，到夜晚10點幾佢同五、六位友人埋單，可頤道別後就揸車走。
露神秘人魚線
鍾意玩微博嘅可頤，前日擺咗張露人魚線嘅相上網，留言：「Happy Boxing Day！祝大家夢想成真。」相中人唔見樣着透視bra top襯超短褲，網友激讚身材弗到爆，紛紛估呢個係咪可頤？不過可頤𠵱家係短髮，相中人就係長髮，有網友估係可頤嘅舊相，亦有網友話唔係可頤：「我知道你沒有那麼黑！」不過可頤一直冇回應，唔知佢幾時肯揭盅呢！
採訪、攝影：陳辰、畢紹基
足本收睇《亂噏24》x劉嘉玲； 鄭秀文@杜琪峯再度登場！
周一至周五《亂噏24》約定你： http://bit.ly/appletalk24