兩大央企中信泰富（267）同中冶（1618），近年因為澳洲西澳鐵礦工程超支單嘢嘈到幾乎反面，兩邊仲經常隔空駁火。不過近排就似乎有啲緩和，之前仲話唔會再同中信泰富合作嘅中冶，仲應承幫新生產線做管理同採購，好似friend番咪幾好。
中信泰富同中冶分別喺聖誕節前後出公告，強調雙方經「友好協商」，中冶會繼續參與澳礦第三至第六條生產線工程，包括項目管理、工程設計、設備採購等，雖然唔係做番承包。不過學CY話齋，同當日實牙實齒話唔會再合作，已經係好重要嘅階段性進展啦。
不過，數還數，路還路，中信泰富同中冶之前因為頭兩條生產線超支超過130億元，雙方陣營因為邊個孭呢條數傾到着晒火，最後有人出手調停下，先改為等兩條生產線完工後一次過傾，中信泰富同中冶就話𠵱家條數已經開始審計緊，華華最怕係再有乜唔妥，兩邊隨時又再開火。
足本收睇《亂噏24》x劉嘉玲； 鄭秀文@杜琪峯再度登場！
周一至周五《亂噏24》約定你： http://bit.ly/appletalk24