歡樂嘅時光過得特別快，兩日聖誕假期就咁完結。唐牛身邊唔少戰友，都去咗澳門吃喝玩樂兼賭番兩手，顯而易見，澳門已經成為強國及香港人嘅熱門旅遊地點，無怪乎濠賭股越升越有。唐牛愛股之一嘅佳景（703），周二亦突破橫行區，再闖高𥧌，中線坐四望五目標已達成一半，現價市盈率只得10倍，戰友可繼續坐定定放紙鳶！
講起過大海，相信大部份人都係選擇坐船，由賭王女兒何超瓊打骰嘅信德集團（242），其中一瓣業務就係經營來往港澳嘅噴射飛航，加上澳門商住酒店等項目，絕對可以視為半隻濠賭股，今年累積升幅僅一成，落後濠賭股幾條街，一旦獲資金垂青，絕對有力追回失地。
信德主要喺中港澳從事地產、運輸、酒店及投資業務，吸引之處在於估值夠平，現價市盈率僅5.2倍，同濠賭股動輒幾十倍PE比較，真係平到冇朋友。你可能會話信德冇賭博業務，有折讓是常識吧。其實信德一直持有澳娛11.5%股權，而澳娛則為澳博（880）大股東，持股達54.99%，即信德變相揸住6.3%澳博股權，以周二收市價計，信德所持澳博總值達89億銀，相當於信德市值64%，澳博炒上，信德自然受惠。戰友可候回試4.4元吸納，中線博一至兩成升幅難度不大。
唐牛
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange