內地打貪禁奢之勢有增無減，國酒茅台、五糧液呢啲往日官商間嘅「送禮佳品」，全部變賣剩蔗，大減價都去唔到貨。五糧液最大嘅經銷商，兼西京投資主席劉央愛股銀基集團（886）就爆出大裁員，內部員工報料說，銷售團隊從高峯期嘅數十人，𠵱家剩低唔夠十個，sales坎坷唔在講，銀基仲打算飛甩大部份嘅下游經銷商。
有白酒營銷專家說，政務「派對」嘅消費佔高檔白酒市場差唔多六成，「限飲令」搞到堆積嘅存貨可能要五年先清到，仲有網購衝擊，搞到大部份高端酒經銷商都裁緊員。佢預言一半白酒經銷商明年底要被人淘汰，仲明插銀基過高依賴單一廠家，好易俾人洗牌喔。
貴州茅台一樣坎坷，股價一落千丈，市值從去年中2,674億元（人民幣．下同），跌至昨日嘅1,295億元，蒸發超過一半，昔日股王失晒威。瑞銀說，最新進行嘅路演上，投資者普遍都對佢嘅銷量前景好悲觀。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange