新昌營造（404）每近年尾，總有一閏，又夠鐘埋位，博新昌翻半番。新昌近幾年自10月打後，當日線圖幾條平均線扭埋一齊，就有料到：2009年10月0.71元，到2010年1月21日升至1.4元，升幅97%。2010年11月尾1.13元，到2011年3月升至2.08元，升咗84%。
2011年，新昌喺10月低位0.78元，升到11月1.43元，時間短咗啲，但累積升幅，都達到83%。
上年又點呢？新昌由12月1.1元起步，到今年頭1.67元，都翻咗半番。新昌由今年7月到家陣一路橫行打底，有咁強嘅cycle底，呢個moment，快夠鐘爆。
遼寧鐵嶺項目有錢途
講番基本面，新昌揸住遼寧鐵嶺「星悅南岸」項目，總樓面3,240萬平方呎，地價每方呎成本只係56蚊咁大把！而首期實用面積366萬平方呎，應該預售緊。
按照鐵嶺新城管委會統計，家陣鐵嶺新城住宅，具備入住條件嘅銷售率，喺95%以上，成個區嘅銷售率，亦達85%以上。而鐵嶺亦已獲列為新城鎮化試點。按大圍情況睇，呢區總體住房銷售唔錯，而鐵嶺亦係城鎮化之下獲眷顧地區，相信「星悅南岸」大有錢途。
係咁意估成個項目每方呎樓面增值200蚊，已經為新昌帶嚟65億銀增值。
就算連新昌呢期配股及行使CB（每股1.53元兌換價）攤薄效應計，每股都額外增值2.27元，係新昌現價（1.12元）嘅兩倍！
連埋新購北京物業（市場估值多增10億銀）及攤薄因素，新昌NAV亦由家陣2.4元，大增到3.5元，折讓推高到68%。
以新昌每年一閏最低升幅參考，要翻半番到1.7元，到時新昌折讓仍然有50%過外。
錢 雋
細價股專家
本欄逢周二、五刊出
足本收睇《亂噏24》x劉嘉玲； 鄭秀文@杜琪峯再度登場！
周一至周五《亂噏24》約定你： http://bit.ly/appletalk24