2013年踏入尾聲，大市收爐味道越來越濃，唔少基金經理都提早放假出埠鬆一鬆。好似豐盛金融董事黃國英（Alex），已經喺星期一（23日）放大假去咗旅行，下周一（30日）先返工，不過佢去咗邊就冇人知，連公司同事都話毫無頭緒，Alex嘅行蹤，真係仲神秘過佢揸嘅貨囉。
另外，聽講喺香港有30個基金經理嘅摩根資產管理，都有唔少人放假，佢哋嘅投資資訊總監崔永昌話，聖誕新年呢類長假多咗人放好正常，況且投資團隊係有backup，一切運作如常。不過假期期間內地同東南亞仲有市，仍有基金經理要金睛火眼贒住個市，平安夜嗰日，佢仲見到中國基金個fundman留底「睇場」。
出埠「鬆鬆」唔一定下下坐飛機，大師沈振盈今個聖誕假就揀去澳門小休，平安夜出發，噚日返歸，今日即返工博殺，佢仲話喺銀娛（027）賭場搵到些少使費，出埠之餘又食又拎，大師果然神機妙算！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange