環顧今年外匯市場，放水與收水繼續成市場話題，日揆安倍晉三推動日本央行無限量放水，令日圓今年成眾矢之的。反而另一主要貨幣美元就各自發展，隨着儲局步入退市，新興市場跌個落花流水，相反，歐洲經濟改善就成為區內貨幣嘅金鐘罩，其中歐元之強勢尤其令人大跌眼鏡。
日圓今年表現真係弱過藥煲，喺環球主要貨幣中，只係差唔過南非蘭特，兌歐元同英鎊就分別貶值25%和21%，兌美金就貶約20%，年初開淡倉後等派彩，年尾已賺兩成，如果做埋孖展回報隨時以倍數計。日圓年中曾顯著反彈，如果心血少啲同唔夠定力，可能年中已被震走，講到尾，喺投資路上心理質素至係致勝關鍵，睇中方向唔一定會贏錢。
執筆時，美元兌日圓噚日曾升到104.84，再創5年高位，隨着聯儲局下月開始收水，市場普遍預期日圓出年好難敗部復活，兌美元跌到去110及115係遲早嘅事。
雖然儲局下個月只係象徵式減少買債100億美元，但好多人覺得出年係美金嘅世界，事關以中國為首嘅亞洲增長故事，喺過去10年係市場亮點，期內資金流向對亞洲傾斜，但時移勢易，喺美國經濟今年加快復蘇嘅同時，中國強勁嘅增長勢頭卻展現疲態，明年增長或只有7%，加上美國出年舉行中期國會選舉，兩黨議員為免流失選票，應該唔敢再拉布，兩個月後再爆發債務上限危機嘅機會應該唔高，而且美國國債孳息上升，資金流向應該對美元資產有利，睇牌面的確係美金天下。
但值得留意嘅係，雖然儲局收水理論上對美元有利，但以今年為例，美元兌各主要貨幣中，淨係兌日圓比較強，兌其他歐洲貨幣其實不升反跌，所以追蹤美元兌一籃子貨幣表現嘅美匯指數，今年其實只係升得1個巴仙咁大把，其中兌歐元就跌逾3%。
澳元似見底 窮寇莫「狙」
歐洲央行行長德拉吉一句“whatever it takes”嘅承諾，撥開歐債危機嘅雲霧，為歐元帶來勃勃嘅朝氣，今年表現異常勇猛，兌日圓和澳元升咗近20%及17%不在話下，兌相對強勢嘅美元亦升近3.5%，表現之佳令市場大跌眼鏡。以經濟增長論英雄，歐洲經濟實在唔得，第二季雖然僥倖擺脫衰退，但Q3僅增長0.1%，以年率計仲要負增長0.4%，跟美國第三季嘅4.1%增長比較，相差不可以道里計。為免重蹈日本通縮死胡同嘅覆轍，歐洲央行11月將利率下調到0.5厘嘅紀錄新低，歐元之後卻反覆向上，較合理嘅解釋係，黃金、澳元幾種近年得寵嘅資產，今年分別因為儲局退市陰霾和中國經濟降溫而成為地底泥，令到值得信賴嘅資產買少見少，資金苦無出路下，唯有轉投歐元，縱區內通縮威脅未除，短期橫行居多。澳元兌美元今年貶值約14%，表現之差僅次於日圓，雖澳洲央行出口術唱淡，指澳元仍偏貴，但個人認為澳洲息口已見底，現水平做值博率應該冇肉食。
奇兵
本欄逢周五刊登
足本收睇《亂噏24》x劉嘉玲； 鄭秀文@杜琪峯再度登場！
周一至周五《亂噏24》約定你： http://bit.ly/appletalk24