上季玩完馬後炮，今季就做預言家，同大家一齊睇吓呢周有咩好睇。今周傾咩：今年英超最驚喜球隊。
愛華頓長期以極少嘅轉會投入，維持到上游嘅成績，球迷一直將呢一切歸功於前領隊莫耶斯嘅厲害！今年莫耶斯離開球隊，唔少球迷都睇死愛華頓實死冇生，唔降班都偷笑！最重要係，新領隊仲係季季帶韋根護級嘅馬天尼斯（圖）。
點知！愛華頓嘅排名仲高過曼聯，更加係今季暫時失波最少嘅英超球隊。愛華頓今季嘅神奇，來自馬天尼斯嘅眼光同實力。佢明知費蘭尼實走，所以喺戰術上降低「爆炸頭」嘅重要性，同時提拔巴克里擔大旗。最後費蘭尼踢咗幾場，就喺轉會窗關閉前過檔曼聯，而巴克里基本上完美接過球隊進攻中場嘅位置。
馬天尼斯真係醒，同當年雲格嚟到阿仙奴一樣，佢想改革愛華頓，但好清楚改革唔好由防線開始；雲格當年重用伯金、比堤同奧華馬斯等歐陸踢法嘅中前場，但唔敢動搖防線4大長老嘅地位，一步步改變兵工廠。同樣地，馬天尼斯今季唔敢郁條防線，維持人腳，但佢深知巴尼斯留唔得耐，所以佢慢慢調節戰術，將巴尼斯喺進攻嘅重要性逐步減低。上季，愛華頓靠晒巴尼斯助攻，但今季就由米拿拉斯、派拿、巴克里以及史密斯高文分擔。
小弟好佩服馬天尼斯同大球會講數嘅能力，佢今季主要係將賣費蘭尼筆錢去買占士麥卡菲，巴利、盧卡古同迪路菲奧都係借番嚟，而且個個都啱用！講真，畀到驚喜小弟嘅唔係愛華頓，係馬天尼斯先啱。最後，咖喱牛腩預祝大家新年快樂，2014年再見！文：咖喱
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange