上季玩完馬後炮，今季就做預言家，同大家一齊睇吓呢周有咩好睇。今周傾咩：今年英超最驚喜球隊。
2013年最後一次咖喱牛腩，老土啲都做番一次回顧；身為阿仙奴（圖）球迷，2013年就好似坐過山車，2月先喺英足盃俾布力般流浪淘汰，歐聯16強再輸俾拜仁慕尼黑，第N次2月連失數盃，萬念俱灰下8年冇冠，但睇住愛隊英超煞科戰擊敗紐卡素僅僅保住英超前4，領隊雲格仲夠膽同職球員開香檳慶祝，真係無名火起。
當冇期望之下，阿仙奴又畀到小弟驚喜，季初阿仙奴轉會新聞禾雀亂飛，到傳到奧斯爾身上，我都仲唔信雲格會打破守咗幾年嘅慳囊，用幾千萬鎊買一個球員，仲幾乎同同屬廠迷嘅守丹賭牙骹，點知幾日後奧斯爾真係去到倫敦高舉阿仙奴波衫。奧斯爾初登英超憑級數抵消身材不足，一啲都冇適應問題，入球助攻源源不絕，雖然苦戰至臨近聖誕終於冇咗榜首，不過對廠迷嚟講，呢4,250萬鎊轉會費抵畀。
阿仙奴另一個驚喜係艾朗藍斯；其實由佢出道，小弟對佢都係彈多過讚，唔似得另一位廠迷戰友蘋果波神，直頭買件印上藍斯名嘅波衫。確實對其賣弄腳法嘅風格唔鍾意，明明可以輕鬆傳波，佢都要整個360轉身先交；不過今季佢嘅埋門把握力真係冇得彈，幾次遠射救番隊波，不過之前又傳巴塞隆拿想買佢，小弟心諗：「唔好啩？」
兵工廠第3個驚喜係防守，撇開腳仔軟對曼城大敗3:6之外，基本對阿仙奴條防線都幾滿意，特別續咗約嘅施捷斯尼信心好好，係就係哥斯尼仲成日鹵莽輸12碼，梅迪薩卡唔夠快，基蘭基比斯助攻唔回防，不過又無人係完美嘅。文：牽牛
足本收睇《亂噏24》x劉嘉玲；鄭秀文@杜琪峯再度登場！
周一至周五《亂噏24》約定你： http://bit.ly/appletalk24