現年48歲嘅郭富城回復鑽石王老五嘅身份，不過佢就未有趁聖誕佳節出動識異性，反而同一班歌迷度過。噚日城城去咗觀塘apm為演唱會嘅DVD舉行簽名會，吸引唔少市民捧場，逼爆成個商場。城城除咗唱聖誕歌之外，又高興到係咁掉禮物畀現場觀眾，又要小朋友錫錫，開心到爆。
揀相難過揀女
雖然城城自爆前晚平安夜同老友食完飯，就一支公喺屋企睇劇本迎接lonely Christmas，不過睇佢表現咁風騷就似乎完全唔介意打單泡喇。城城話：「DVD入面嘅相集揀相揀到好頭痛！」馮仁昭即問佢揀女友頭痛啲定揀相難啲，佢就話：「揀相同決定DVD入面揀用邊啲鏡頭最難，𠵱家完全冇諗感情事，所以寧願聖誕節開工與眾同樂。」 城城又話2014年會全副精神放晒喺拍戲上面，恭喜完許志安同鄭秀文嘅佢話，今年聖誕冇女仔約，如果遇到意中人會同大家講，仲話媽咪一直冇追問感情事。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！