【2013年回顧之樓市篇】
一眾樓市專家去年預測2013年樓價會跌，結果上周公佈的中原城市領先指數（CCL）創下31周新低，而中原城市大型屋苑領先指數（CCL Mass）亦創近10個月新低，但全年CCL仍然錄得約2.45%輕微升幅，始終都是一地眼鏡碎。面對發展商減價賣樓及美國退市，2014年本港樓市勢將風高浪急，專家今勻都唔敢亂講，保守估計本港整體樓價會跌一成。
記者：陳家雄
本報找來四名樓市專家分析明年樓市前，先翻查其去年預測，發現升跌皆有，其中大學教授曾淵滄曾預言樓市冇乜升跌，用家何時買樓都可以，似乎為四大專家中最貼近事實。
曾淵滄明年仍企硬「用家隨時可上車」的論調，「用家乜時候都可以買，97年都可以買，最重要供唔供得起，供甩咗，層樓就係你嘅，唔使理樓價升定跌。跌，咪由得佢跌囉！如果你想喺最低位入市，一世人只得一、兩次機會，2003年對上一次是1984年。總之，樓價有升有跌，長揸一定贏。」對於明年樓市走勢，「出年好多變數，包括美國加息，變數太多，真係唔識睇！」
豪宅高危 細單位較穩
中原地產創辦人施永青去年底預測，今年農曆新年前樓價下跌15%，結果中原領先指數CCL由115.78點（2012年12月底），升到3月123.66點，升幅6.8%。4月他撰文指中原指數有得跌，冇得升，隨後半年只跌10%，而一手樓價會跌5%至20%，豪宅估計跌兩成。結果下半年發展商賣樓普遍提供兩成優惠，豪宅頻錄減價成交，證明長期堅持，一定中番次。
施永青接受本報訪問表示，預計2014年整體樓價會跌一成，一手跌15%至20%，二手方面，豪宅跌得甘啲，中小型單位硬淨，或僅回落5%。他解釋，香港經濟基調好，又有租金支持，點會出現「插水式」下跌，就算美國加息，步伐也不會太快。
經濟學者關焯照表示：「樓價跌就跌硬，睇下跌幾多。預期明年整體樓價起碼跌一成，豪宅跌得勁啲……一個唔好彩，息口有少少郁動，加一次息，已經嚇到人雞飛狗走。如果美國退市退得快，本港樓價甚至跌逾兩成。」他強調：「買樓要三思，樓價跌硬，現在肯定唔買。不過最細類型單位，即約430方呎以下，就唔怕跌，因空置率低，供應少，較為穩陣。」
政府插手 寧買地產股
去年預測2013年樓價升一成的Bricks & Mortar分析員王震宇亦表示：「出年冇得睇呀！現在政府插手，搞到樓市根本就唔可以用理性分析，情況就如同你在路上揸車，全部人都有牌嘅，大概知道條路點行，忽然間有個癲佬落嚟，橫衝直撞，你點揸啫！」
王震宇續稱：「樓市升定跌，真係唔想多講，因為目前唔係用經濟角度，係用政治角度，完全唔理智，政府做嘅嘢可以同自己意向相反，佢想壓樓價，但樓價反而升得仲多。」他說：「用家想買樓，不如先租樓，同時買地產股對沖租金，因為目前地產股有三、四成折讓，又或者考慮其他投資其他地區。雖然本港基本因素唔差，但真係唔知政府最終會令到樓市點樣。」
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24