本月中，商務及經濟發展局局長蘇錦樑披上針織背心連頸巾、開襟毛衣，走上天橋chok樣行花生騷。為蘇局長設計時裝的，是37歲年輕設計師譚筠澤（Gideon）。擅長設計男裝毛衫的Gideon，擁有以自己名字的時裝品牌，設計作品遍及香港、英國、法國的貴價百貨公司。請他品評港人衣着品味，他說：「香港人着衫比起好多國家地方，跟風係跟得最犀利，呢個係我唯一感覺。」
未成名前到處碰壁
時裝總有潮流，但Gideon認為，應追隨合適自己潮流的衣服：「着衫最緊要畀到自己信心，呢樣係最重要，而唔係跟風着一啲唔適合自己嘅衫，着到出嚟嘅時候，成件事會有反效果。」
買衫的是否跟風，也要視乎買衫時有否選擇。平日穿自己設計或「貨辦」的Gideon也承認，香港時裝店近乎壟斷：「來來去去都係幾間，差唔多係一個壟斷式市場，我希望睇到多啲唔同牌子嘅店舖，暫時香港都係不同牌子以連鎖式去營運。」
要讓本地品牌給眾生選擇很是困難。擁有自己品牌的Gideon坦承，設計要先獲買家垂青，及後要廠家願意承造低產量，過程是到處碰壁。他未成名前，寄出過百封「自薦信」，命中率是百分之三，「開始做自家品牌嘅時候，每一日都要打畀個buyer，要好厚面皮，成個過程係好辛苦，不斷敲門、打電話，攞住成篋衫，南下北上」。
設計是值錢，出自Gideon手筆，一件毛衫入場費最低盛惠四位數，蘇錦樑當日「行騷」，上身兩件衫便價值一萬元。由度身訂做至走上天橋，Gideon大讚蘇錦樑全無挑剔，任他擺佈，「佢肯咁做，對業界係好大嘅支持和鼓舞」。
這場花生騷是由一班時裝設計師、文化工作者組成的非牟利機構Fashion Farm Foundation主辦，目的是搭建平台讓本地設計走上舞台，當晚的作品現於荔枝角D2 Place商場展出。
記者：姚國雄
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange