現年34歲的林峯與20歲的吳千語拍拖以來，一直煙韌猶如糖黐豆，兩人年齡雖然相差14載，可是越愛越甜蜜，前晚峯語一起出席生日派對，其間千語BB不避嫌大晒手上的疑似訂婚鑽戒，宣示與林峯更進一步，兩人的感情已轉入直路，準備拉埋天窗。
顧紀筠前晚平安夜為夫婿陳仕偉在君悅搞六十歲大壽派對，不少演藝情侶都來捧場兼慶祝聖誕，除同是壽星女的鄺美雲帶同男友林達民外，謝賢、狄波拉各自攜眷，不過論搶眼，當然是林峯與吳千語這一對。
愛得癡纏猶如連體嬰的林峯與千語BB前晚9時許坐七人車到達，林峯率先落車，站在車旁有風度地乖乖等候女友落車，千語BB身穿黑色短裙騷長腿，與林峯的黑色西裝襯到絕。雖然二人婉拒記者訪問，但仍大方企定定任影，林峯對千語BB呵護備至，不時忍不住輕攬女友纖腰，似怕女友跌倒似的，其間千語BB擺明有意舉起右手輕掃秀髮，大晒無名指上的疑似訂婚鑽戒，非常風騷。兩人又不時情不自禁互望，溫馨和癡情程度簡直羨煞旁人，就像預演婚後去ball的甜蜜生活。
拍劇清工作
其實林峯與千語BB向來愛得高調，不理無綫要求藝人拍拖低調政策，有傳明年約滿離開的他整年未為無綫拍劇，反而多次與千語BB拍拖外遊，前晚千語BB更刻意展示手上訂婚鑽戒，宣示關係更進一步，看來兩人已準備好拉埋天窗！千語BB昨日被問到是否跟林峯已訂婚時，例牌否認，至於鑽戒是否男友送贈、明年會否結婚，千語BB透過經理人Carmen回覆未有否認是訂婚戒指，只說：「暫時未有結婚計劃，亦唔想答戒指係邊個送呢啲問題，唔想去人哋嘅活動搶咗人哋嘅風頭。」
林峯情場得意，事業去向卻成謎，他跟無綫的經理人合約亦在明年中便告屆滿，早前有傳他心灰意冷決意離開轉投黃百鳴旗下，而黃柏高的太陽娛樂亦向他招手，甚至有傳林峯會自組製作公司，雖然他下月會返無綫拍劇，但據知只是履行合約內應有的工作。林峯昨日接受商台節目《1圈圈》電話訪問時，承認下月開工，至於會否續約，他淡然說：「往年差唔多約滿會傾，今次仲未傾，但有傾未來嘅工作，我唔擔心。」對於有指他會轉投黃百鳴旗下或被太陽娛樂重金禮聘，林峯否認會簽約賣身，但坦認會合作。
與公司作對
林峯向來是無綫最痛錫的親生仔，可是自去年視帝獎項臨門轉到黎耀祥手上後，林峯跟無綫關係生變，多次與公司作對，包括堅持要接拍nowTV與內地合作的劇集《大漢賢后衛子夫》，甚至先斬後奏參與千語BB經理人公司攝製的賀歲片《六福喜事》，而上月又以做了割盲腸手術為由，臨時辭演台慶的「懸浮舞」表演。
採訪：盧妹
攝影：黃文偉
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24