立法會早前大力反對政府擴建堆填區，議員發言時個個咬牙切齒批評政府未做好源頭減廢工作，點知環保組織長春社近來做咗個立法會「垃圾審計」，結果都幾驚人。組織喺各層議員辦公室都搵到大量可回收物品，10樓可謂重災區，好多議員都係大嘥鬼，一啲都做唔到源頭減廢！
糖果餅乾香蕉被丟棄
長春社喺11月中進行兩日「審計」，發現大量可回收物品被棄置，當中以食物為主，餅乾、糖、成梳香蕉、連盲公餅都有，另外有未用完嘅文具，仲有鞋同襪㖭，單係10樓就有2.68公斤可回收物品。
10樓議員包括人民力量、社民連、工聯會，加埋新民主同盟、工黨張超雄等，仲有立法會秘書處會計部。不過，大部份議員都唔認係「大嘥鬼」，話辦公室冇呢啲嘢食，好似人力慢必陳志全就斬釘截鐵話一定唔關佢事，因為佢好少買零食。
至於工聯會嘅黃國健、長毛梁國雄同新同盟范國威（Gary）都話office冇呢類食物，Gary話會預乾糧等開會夜咗都唔會餓親，但都係杯麵。
黃國健唔知有回收桶
唔通垃圾會從天而降？定係有人想「陷害」議員？工聯會郭偉強接受有線電視訪問時就承認：「盲公餅有見過。」應該係佢同事去旅行買嘅手信，可能唔啱口味就扔咗。
查實立法會秘書長話每層茶水間都有三色回收桶，但唔少議員都冇為意，好似黃國健咁，佢竟然話立法會垃圾中搵到咁多可回收物品係因為冇回收系統喎！
如果議員律人以嚴，但卻寬以待己，咁政府下次再就擴建堆填區闖關時，議員都幾難理直氣壯批評喇！
mailto:[email protected]
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24