聖誕前睇到一段最反胃嘅新聞就係黑人籃球明星洛曼Rodman再度訪問北韓，佢以前到過北韓扮親善大使，與金正恩坐埋一齊，左丁山當時嘅感覺係儍佬與細路坐埋一齊，冇乜點。但自從金正恩坐定定，誅殺親姑丈張成澤（都應該唔係乜嘢好人）之後，仲要係（根據練乙錚教授引述之文匯報報導）「犬決」姑丈，即係用120條餓咗三日嘅餓狗在大鐵籠內吃掉裸體嘅張成澤及數名親信，金正恩還要太太及近三百名高官現場睇住之後，個人認為金正恩係大邪魔，任何人以後再到北韓旅行及購買北韓物品，都唔想同佢來往。洛曼本是幾好波之人，但竟為了不知甚麼原因，與金正恩為友，甚為可恥。
金正恩呢種性格與上天不容之獸行，當然並非從石頭爆出來的，而是金家三代（金日成，金正日，金正恩）皆染有史太林基因之故，共產黨之殘暴性格，在史太林身上發揮得淋漓盡致，毛澤東得其箇中三昧，金日成從史毛兩大魔頭偷師學藝，自然傳埋俾子孫，上星期出版嘅《亞洲周刊》封面故事：「俄國鏡子映照朝鮮」，講史太林大權在握之後，在1930年代如何誅殺列寧近衞軍及疑似政敵，手法之蠻不講理及殘暴，在新中國五十年代中至一九七六年打倒四人幫為止，同樣在中國翻版出現。
金正恩「狗決」姑丈，原來史太林亦曾利用狗。佢在俄國沙皇末期，與一眾「革命志士」被捕流放，共處一室，眾人輪流清洗食具，輪到史太林洗碟時，佢居然搵隻狗返來舐舔各食具，將食具舐舔得乾乾淨淨，同伴知道後，對佢痛恨之極，但咁嘅壞人，後來緊握蘇共大權，同志與人民就冇運行咯。
中學同學S知道「狗決」呢回事後，震驚又震驚，21世紀咯，地球上竟然還有如金正恩此野蠻人，中國政府繼續支持佢，為了政治喎，政治這回事，可說有多骯髒便多骯髒。同學S上網搜查到張成澤嘅罪狀，長到極：「反黨反革命宗派分子，現代版宗派的頭目，惡毒的政治野心家、陰謀家，狗不如的人間渣滓，令人髮指的大逆行為，不可饒恕的滔天大罪，黨和革命的敵人，人民的仇敵，窮兇極惡的叛國賊，兇惡的野心家、陰謀家、千古逆賊…… 」睇完問你驚未。不過咁，文革時代，紅衞兵、四人幫批鬥劉鄧份子，何嘗不是如此，北韓照抄而已。