一隻馬跑快活谷，如果全程被頂響外叠，會有幾大影響呢？以下係一個活生生例子。
尾場「喜多盈」今季轉過嚟快活谷跑，第一場跑1650米排8檔起步，出閘雖然有啲論盡，但好快已經霸到個內欄靚位，終點前三幾步過晒，犀利。再出又係跑同程，嗰次仲衰，排11位起步，但唔使好耐已攝到入內欄，沿途慳位，又係一條直路過晒，贏到「贏得」冇得跑，犀利加犀利。上次排8檔唔太差，不過冇咁好彩嘞，沿途被頂喺外叠，一路蝕位大敗，賽後仲發現氣管好多痰，一千四百幾萬W投注冇晒。
今次「喜多盈」排一位，唔使擔心會走外叠，而且潘頓哥哥近兩季同程五匹一檔座騎得一W四P，合埋眼都識跑，應該可以補中咯！
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange