【九龍塘】蔡卓妍（阿Sa）同陳偉霆拍拖三年，兩人感情好穩定，成日自出自入對方嘅屋企，好似之前陳偉霆趁阿Sa外遊時走咗上女友家，點知佢上載照片到微博被網友爆私闖Sa家，最後阿Sa更開腔護男友。
掃派對用品
陳偉霆前晚到澳門出席頒獎禮，雖然阿Sa有份爭影后，但佢冇現身，反而留喺香港做廿四孝女友。前日下晝約3點，阿Sa同傭工到九龍塘又一城Log On，佢喺裏面買咗兩個暖腳器，之後又買咗一大堆聖誕派對用品，足足買咗成千幾蚊，行到攰嘅阿Sa跟住走咗去王家沙醫肚。阿Sa發現有記者追訪，但仍然繼續佢嘅shopping之旅，到Francfranc買咗個相架，又到Mont Blanc買咗幾支筆，前後行足兩個鐘。
滿足完購物慾之後，阿Sa揸車走人，不過架車啲車窗全部都係黑玻璃窗，擺明唔啱規格，唔知關唔關阿Sa剛考車牌事，所以唔清楚法例，之後佢到九龍塘港鐵站接人，亦都懶理嗰度係單黃線，照停車接咗一班唔知係佢家人定係男友嘅屋企人，跟住就直駛去陳偉霆嘅寓所，估計佢以女主人身份招呼男友嘅親友，喺屋企開聖誕派對。
採訪、攝影：畢紹基、朱志聰
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24