對香港球迷來說，捱夜睇英超或其他足球比賽不難，但要睇NBA呢？絕非易事。平均兩個多小時的一場比賽，加上大量暫停和instant replay，深宵睇波時瞓着絕不為奇。話雖如此，每年聖誕還是堅持傳統，和老友一齊捱夜睇直播；這聚會近年更越搞越大，透過體育品牌參與，同一大班熱血籃球人睇波兼傾波鞋經，試過在幾度的日子冒寒天未光出門，睇完波後熱血沸騰回家，這種體驗，一刻無價。
一如英超，NBA為了娛樂球迷，聖誕節也如常比賽，不過前者是拆禮物日上演大戰，後者則在正日獻技。NBA的聖誕比賽源於1947年；雖然不少球員都抱怨佳節也要比賽，作客球隊更分分鐘要遊一輪飛機河；難怪前魔術教練史坦雲根迪亦試過要求聯盟，不要再於聖誕安排比賽。
不過，聖誕睇波始終是傳統，而NBA亦不放過絲毫宣傳機會，自從勒邦占士轉投熱火後，大多安排他和拜恩、即熱火對湖人作為頂級戲碼，意味這場大戰多於中間場6時左右上演；球迷如要原汁原味享受，非要於清晨起床不可。而近年亦會在比賽時宣傳新球衣，如上季的五彩球衣，今季的短袖球衣等等。當然，各大球星亦會於此時穿上聖誕版球鞋，以令睇完波的球迷更捨得花錢。
香港的一剔牌這幾年亦和波鞋網站Hk-Kicks合作，大搞名為「早餐會」（Breakfast Club）的睇波睇鞋團。一班球迷摸黑到專門店，然後齊齊睇波。而主辦單位除會提供早餐，中場休息時就會講波鞋，睇完波之後又book定場打波，熱血到極點！最難忘應該是10年，因為當時請了「桂神」黃興桂到旺角的專門店，與球迷齊齊睇波，簡直是有今生，冇來世！身為死忠湖人躉的「桂神」，卻只能看着湖人在主場被熱火攻陷，以80:96慘敗，「大帝」更取得三雙：27分、11籃板及10助攻；而且第3節已幾乎是垃圾時間，全場都非常冇癮。睇波興奮，其實背後付出不少功夫，例如上年就見到主辦單位，在睇波前的一晚既要佈置場地，之後又要研究波鞋擺位，最慘是現在台的解碼器忽然失靈，要四處打電話「班貨」，搞到半夜，小睡片刻後就正式開波，難怪完成後個個工作人員散晒！
今年仍有5場大戰，而中間場又是湖人對熱火，緊接上演的更是難得在此檔期出現的馬刺對火箭；可惜因種種問題，今年的「睇波早餐會」辦不成，而「聖誕之王」拜恩，又因膝傷無緣披甲，但身為球迷，肯定依舊約齊老友，由6時起連睇3場直播，然後瞓上半天，養足精神再等晚上曼城對利物浦開波，讓拆禮物日變成難得一見的足籃盛會。文：仙道彬
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24