舒活坐正做熱刺領隊，但外界都唔睇好，認為佢只係臨時工；咁又難怪，因為喺佢帶領熱刺以3:2擊敗修咸頓場波嘅4-4-2排陣，真係好old school，似乎仲停留喺以隊長身份帶領布力般流浪奪得英超冠軍嘅年代（圖）。
仲記得布力般喺92年升上英超時，領隊杜格利殊雄心壯志，諗住買法國球星施丹或杜加里，幫球隊打天下，但已故班主獲加就話：「你都有舒活，仲使乜買佢哋呀？」獲加果然夠眼光，布力般喺舒活統領中場下，加上「SAS」舒利亞同瑟頓（唔係阿蘇同史杜列治）發揮超勁，喺94/95球季就力壓曼聯，成為英超冠軍。或者，當年布力般嘅4-4-2經典陣容，依然常在舒活心中，咁佢帶領熱刺，就自自然然排咗呢個陣出嚟。
舒活唔單止念舊，另外我好欣賞佢顧家；如果佢唔係顧家，更未必會同熱刺結緣。喺99年初，佢為咗另一半嘅事業同埋家族生意，毅然離開布力般，南下加盟熱刺，展開咗同熱刺一段到現時都未知係良緣定係孽緣。文：吾中
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24