卡比路喺俄羅斯好食好住，法蘭迪保亞喺阿積士好開心，軒迪克唔想接燙手山芋，雲高爾下年先同荷蘭約滿；熱刺主席利維呢幾日頴爆佢個光頭，都搵唔到人頂波亞斯個位，逼於無奈之下，畀咗18個月合約舒活，等佢坐住領隊個位先。但睇個勢，當利維搵到大牌領隊返嚟後，舒活都會燉番落去。
英超少見短期合約
雖然舒活首戰帶隊喺英聯盃輸咗俾韋斯咸，但喺星期日嘅英超，佢醒醒定定，帶領熱刺作客贏修咸頓3:2。見舒活交到貨，熱刺喺星期一就透過官網正式宣佈佢坐正，但份約只係得年半。對於英超球隊嚟講，通常請領隊都唔會畀份咁短嘅合約，可見利維根本信唔過舒活，屬意大牌領隊接班；英國傳媒估計，舒活只係替工，利維最希望雲高爾下季嚟接班。雲高爾𠵱家係荷蘭國家隊教練，教埋出年世界盃就約滿，而佢應該唔會同荷蘭續約。
當然，利維喺公開場合就要力撐舒活，佢話：「我哋真係唔想喺季中換領隊，但為咗球會利益，惟有咁做。我哋有一個好陣容，係差個可以帶球隊踢出好成績嘅領隊。好高興，喺球會內部有一個好似舒活咁有才能嘅教練。我哋信舒活，信佢有足夠能力帶領球隊前進。」
賀治比燉落預備組
舒活過去同波亞斯關係惡劣，𠵱家上位，即刻樹立自己嘅親信，打壓波亞斯啲舊將。由上場對修咸頓嘅陣容，已經睇得出舒活鍾意用咩人；正所謂「敵人嘅敵人就係朋友」，佢重用艾迪巴約，而呢位多哥射手亦向舒活表明效忠。舒活提拔法國19歲中場小將賓特納，派佢後備上陣對修頓。同時，佢冇派賀治比同伊天卡普爾上陣，仲將佢哋燉咗落預備組。
新帥上場，左閘丹尼路斯相當醒目，立即落足鞋油：「外界話舒活唔係大牌，冇份靚履歷，但佢壓得住球員，唔會畀球隊亂。喺舒活第一課操練，有幾個球員遲到，佢立刻罰佢哋跑圈。舒活訂立咗新規矩，我哋唔能夠挑戰佢，佢講嘢，我哋一定要聽。」
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24