「迷彩兵團」殺入全港學界精英籃球賽男子組決賽！所講嘅其實係上屆亞軍桂華山，球員親自設計橙黑迷彩戰衣上陣，噚日喺林士德體育館嘅4強，以34:30擊敗英華，今日同男拔萃爭男子組錦標。
港島區D1盟主嘅桂華山，頭兩節表現麻麻，防守失誤頻頻，落後14:20完半場，激到教練翁金驊好勞氣；提點完後，終於有起色，隊長朱浩雯射入全隊最高13分，包括4個3分波，第4節初段反超前1分，加上英華呢節射失多個罰球，結果「迷彩兵團」險勝4分，連續兩屆殺入決賽。朱浩雯預告冠軍戰會着一套新戰衣，「4強呢套衫係成隊一齊設計，顏色好醒神，效果好滿意。決賽就諗住着紅綠色波衫，迎合平安夜。」
另一場準決賽戰況就一面倒好多，上屆季軍男拔萃70:28大勝寶覺。寶覺女隊就威爆，以46:37力壓真道，決賽硬撼衞冕嘅協恩。
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24