歐洲幾個聯賽完成周日比賽就歇冬，起碼過埋聖誕同新年先重返戰線；不過一班球員冇因為就嚟放假就hea踢，部份仲好好火㖭；好似意甲米蘭打吡就講埋手，西甲巴塞隆拿靠柏度洛迪古斯連中三元，反勝基達菲，恩尼斯達仲疑似火辣辣露臀贈興！
露股者疑似小白
巴塞隆拿2013年最後一仗作客基達菲，雖然美斯未復出，又有尼馬停賽，兼且頭15分鐘已經落後0:2；不過巴塞好手何其多，前鋒柏度洛迪古斯由34分鐘開始，9分鐘內連中三元，加上法比加斯下半場梅開二度，以5:2反勝，壓過馬德里體育會上返榜首。
柏度今季第2次帽子戲法，一樣好開心，賽後同小將基斯甸泰路喺更衣室合照，仲放晒上社交網站，點知左邊出現一個換緊衫嘅球員，打出白雪雪屁股。碧基仲好衰咁叫人估係邊位，仲列埋不可能嘅選擇，包括黑人球員桑治，其他心水清球迷就估主角係「小白」恩尼斯達，唔知當事人會唔會搵柏度算賬呢？
沙比耳膜都穿
西甲另一場比賽，由華倫西亞主場對皇家馬德里，戲碼都算強；皇馬由迪馬利亞、基斯坦奴朗拿度（C朗）同謝斯洛迪古斯各建一功，以3:2險勝。全取3分絕對唔容易，特別C朗所入嘅第2球，仲有越位之嫌，華倫職球員當然好不滿。不過點都好，C朗已經累積164個入球，追平墨西哥名宿山齊士，排名皇馬聯賽累積入球榜第4位。
皇馬贏波，不過就折將，中場沙比阿朗素13分鐘被對手手踭撞中，左耳耳膜竟然穿咗個小窿；因為耳仔唔可以再受壓，賽後未能跟大隊搭飛機返馬德里，要搭車返歸。球隊安排醫生等沙比返到馬德里就接受治療，好彩初步診斷聽覺未有受損。
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24