喺伊利沙伯醫院（QE）做咗30幾年嘅九龍中醫院聯網總監熊志添，將會接替早前退休嘅馮康，出任新界東醫院聯網總監。噚日係佢喺QE嘅last day，明年1月1號就要去威爾斯親王醫院返工。佢近排不斷出席大大小小嘅farewell活動，噚日就輪到同八方一眾傳媒好友食飯，回顧吓QE大小回憶，仲有「怪譚」……
熊醫生喺QE做咗咁多年，原來聽埋聽埋唔少鬼古，例如醫生宿舍就成日傳有鬼，因為經常有人聽見喊聲；又有人話呢，手術室啲凳會自動升降㗎，嘩！醫生，真係好怪異呀！佢就話，做醫生係唔信有鬼嘅，宿舍喊聲，估計係病房傳嚟咁話喎，佢份人真係理性。
佢又提到屋企人，原來佢太太都係醫生，但係兩個仔就無繼承衣鉢，一個係飛機工程師，另一個就玩音樂，現場女記者都大讚有筍盤。
講番QE，據聞施政報告將會提到重建計劃，QE嘅緊急同住院服務會搬去啟德新醫院；熊醫生噚日就唔肯講詳情，只係話𠵱家仲喺探討可行性嘅煲水階段，但係重申1963年啟用嘅QE環境擠迫，令惡菌肆虐，真係需要改善。
「威院有10%人難搞」
今年威院新聞多多，淨係余卓文被封刀單嘢，都搞咗一年都未解決。熊醫生話，唔太認識威院嘅人，相信第日唔會凡事沾手，會用番管理技巧，放手畀下屬幫手去做；至於人事複雜問題，佢就耍手擰頭話唔講，只係話應該只有10%人係難搞咁話。噢，咁唔知佢有無鎖定邊啲係難搞嘅目標呢？
mailto:[email protected]
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24