今季NBA聖誕日同場加映波衫大戰，以短袖做主題。日前，將於聖誕賽作客湖人嘅熱火，就特登換上短袖衫練波，之後「大帝」勒邦占士就話自己着上冇咩問題，但就擔心隊中射手會受到影響，不過周日快艇主場對木狼，兩隊都着短袖波衫，表現睇落又冇咩問題喎，係咪熱火班人奄尖咗啲呢？
占士鍾斯：執生啦
聯盟上年推出短袖波衫，球員同球迷意見有讚有彈。今年聖誕節大戰，聯盟決定用短袖波衫，當日上陣有5場波都會着聖誕版短袖波衫。熱火今個聖誕首次着短袖波衫，球會喺練習時，特登安排短袖練習衫畀班球員習慣吓。之後佢哋接受訪問，就有唔少球員有微言。
防守鎖匙人柏迪亞就話感覺好怪：「（短袖波衫）感覺有啲奇怪，我自己最大問題係，啲汗整濕咗件波衫之後，太貼身搞到好唔舒服，可能係因為材料唔一樣啩。」而3分射手占士鍾斯就認為：「我仲未肯定件波衫喺比賽時會對我哋起手有咩影響，不過都係自己執生啦。」
快艇着短袖照贏
大帝一早就已經着過件波衫，拍聯盟聖誕大戰廣告。佢今次練完波後，都係擔心件衫對射手有更大影響。而今次着住嚟練波，大帝就話：「着起嚟問題不大，如果可以着住佢練習一段時間，比賽應該冇咩問題。」不過，周日快艇對木狼，雙方都着短袖波衫，客隊主力路夫更有45分、19個籃板嘅紀錄，睇嚟唔似有好大影響喎。
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24