節儉係美德，但係立法會議員范國威就因為慳錢惹麻煩。事緣佢上年參選立會，定咗只係花60萬，但「告急」告得太忘形，超支34萬，結果要去高院申請豁免刑責。
法官就唔多like佢嘅解釋，話佢對管數嘅選舉助理完全無監管，用多咗錢就去法庭攞豁免，會開壞先例云云。不過法官都畀多一次機會佢，將單案押後到下個月8號，等佢呈交誓章解釋。
告急超支申豁免
其實由范國威牽頭嘅九人選舉團隊，原本使多過262.5萬先至會超支，但佢哋就定咗個怪規矩，范只可以使60萬，其餘八個人就每人兩萬，仲向選舉事務處申報咗。點解咁奇怪？「咖喱飯」噚日喺庭外解釋，因為佢哋冇乜資源，所以定咗呢個「史無前例」嘅制度，自我警醒，唔想借到「一屁股債」，點知選舉前兩個星期發現有機會當選，所以就「發晒狂」告急，搵多啲人手派傳單、賣多啲廣告，加上個選舉助理得20幾歲，無經驗，使凸咗都唔知，結果超支34萬。
佢又話，如果喺投票日之前向選舉事務處更正資料就無事，以後都唔會冒咁嘅風險，將選舉開支定到咁低。
根據《選舉（舞弊及非法行為）條例》，如果范國威攞唔到豁免，分分鐘俾廉署告，可以判監一年同罰款五萬，唔算係小事一樁。
案件編號：HCMP1080/13
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange