【記者蔡朗清、梁德倫報道】瑞士十大名錶之一、以「Happy Diamonds」鑽錶揚名的蕭邦（Chopard），一款原價31萬元限量版鑽錶，疑機芯與鑽石機殼無故分離。事主要求蕭邦退款或換另一款錶不果，蕭邦反指客人撬爛手錶，商討當日，職員在事主不知情下，自行嵌回手錶交還。鐘錶收藏家Mickey指出，職員處理手法兒戲，「一隻頂級錶查都唔查，職員自己嵌實就交番畀客人，做法好唔專業。」
職員自行嵌回
王小姐（化名）家人經常買蕭邦腕錶，故成VIP顧客，而她父母上月再於蕭邦選購多隻貴價腕錶，並送贈其中一隻限量版鑲鑽腕錶給王小姐，原價31萬元，「五、六折咗都要超過20萬蚊㗎。」因腕錶價值昂貴兼具紀念價值，王小姐只曾戴過兩、三次。但上周四她打算戴上腕錶出席活動時，手錶中央部位機芯卻整個跌下，與鑽石外框分離，「戴得咁少次，有乜理由無故甩咗錶芯出嚟？」
王小姐當日馬上到蕭邦銅鑼灣辦事處要求退貨退款，對方表明貨物出門不能退換，又質疑王小姐「係咪自己搵嘢撬開過隻錶呀？」她大感不滿，「正常人點會無端端攞隻幾十萬嘅錶去撬呀，咁樣講係侮辱我」。
王小姐經多番理論，職員指可嘗試向總部要求運送另一全新同款錶更換給她，「我𠵱家根本對呢款錶冇晒信心」，職員着她先放下手錶。王小姐離去後，友人提醒她不應將問題手錶留給蕭邦，故即日折返領回手錶，但發現手錶已被嵌回原狀，職員更指已「好實」不會鬆脫，「都冇問過我，職員自己嵌番實隻錶就當解決問題，咁大間錶行咁都得」。
蕭邦一名職員回覆本報電話查詢時稱知悉事件，亦承認肇事手錶帶簇新，同意事主只戴手錶數次，表示會跟進；但其間電話突斷線，之後蕭邦另一同事回電稱須書面查詢。蕭邦最後以書面回覆稱事件罕見，會跟進及與客人商討。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange