【中環】近日有新戲《喜愛夜蒲3》上演嘅何佩瑜（Jeana），導演錢國偉真係冇搵錯佢拍呢套戲，事實上佢真係一位夜蒲王。噚日凌晨12點幾佢同三名貌似band友嘅男仔，同新八模嘅黃雪瑩（Suki Wong），去咗中環歷山大廈夜場玩，專誠捧美國著名DJ Dubfire打碟，一行5人玩到凌晨4點半。
飲咗唔少酒嘅Jeana落扶手電梯時腳步浮浮，佢哋落到地下冇即刻走，而係轉番上隔籬嘅樓梯坐。原來一班人煙癮起又唔想企街食煙凍冰冰，所以寧願犯法都要入番室內食煙。
乘機抽水
Jeana二話不說去到樓梯就內地人上身坐咗喺度，不過佢嘅衫太單薄，要Suki借件衫畀佢披住。其中一名男友人唔知點解忽然換衫，身邊嘅Jeana見機不可失乘機抽水係咁摸，相信佢都係想暖手居多，暖完手掌唔夠仲要暖埋手背，足足抽咗5秒水，最抵死係佢仲要整埋對高潮眼出嚟。之後一行5人行咗去對面置地廣場截的士離開。另外，近日官非纏身嘅楊家誠都帶埋3女1男捧場，睇到凌晨4點先坐車走。
採訪：黃曉程、吳耀輝
攝影：梁繼光
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！