郭可盈同林文龍嘅寶貝女林天若（乳名津津）下月中就4歲，津津唔單止生得精靈活潑，仲好有音樂天份，半年前開始學彈琴，最初老師擔心佢手指未夠力，先讓佢試玩，點知老師見手指長長嘅津津好有天份，同埋夠專注有節奏感，破例收佢為徒，津津學咗半年即見成績，上周被邀請出席鋼琴表演，仲係台上最年輕表演者，繼承咗父母嘅演藝細胞。
到場打氣
津津嗰日紮起頭髮，夾上粉紅蝴蝶頭飾，襯番粉紅斗篷同長靴，驟眼望去成個「mini版可盈」，司儀叫津津出場，佢就坐喺鋼琴前，彈咗兩首《Love Somebody》同《Merry Christmas》，文龍同可盈喺台下為愛女打氣，可盈好驕傲囡囡表現淡定冇怯場，可盈噚日喺電話度話：「佢自細就好鍾意音樂，兩歲已識唱好多經典金曲，佢鍾意我會培養佢，但一定唔會谷佢，我絕對唔係乜嘢怪獸家長。」
撰文：馮仁昭
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24