英格蘭同德國喺球壇一向水火不容，一對冤家近日更將恩怨扯到普天同慶嘅聖誕佳節上。德軍喺11月友賽，以1:0輕取英格蘭，三獅新希望史杜列治同安祖斯唐辛，喺德軍面前都被打回原形。德國攞晒彩都未肯收手，當地最暢銷嘅《圖片報》仲嘲諷英國人暴飲過聖誕，激死一班英國球迷。
《圖片報》日前以「英國人在聖誕」的標題，配上一班怒漢打交、女生醉酒瞓身垃圾堆（圖）、醉漢揭人裙底等狼狽相，諷刺平日以紳士、淑女自居嘅英國人點樣「酒池肉林」式紀念耶穌誕生，文中仲寸嘴形容：「一群由地獄解放出來嘅英倫狂歡者」，齋聽都想像得到有幾沉淪。
不過英媒都唔係一盞省油嘅燈，報以大標題「呸！漢堡」作出大反擊，仲話英國人怒飲嘅同時，唔好忘記貴國每年大搞聲名狼藉嘅啤酒節，同向世界供應最多口味嘅酒水；更搵咗德國人喺文中「倒戈」講道理，指唔係英國人太癲，而係德國人太嚴肅古板唔識得玩！
咁又唔係喎，德國球星中至少都有「玩家」奧斯爾做表表者嘅。不過今夏空降英超嘅「大眼仔」要趕上英超聖誕快車，今年冇得玩喇！文：呂晨
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24