噚日喺坑口體育館舉行嘅傳媒盃籃球賽男子組決賽，《蘋果日報》籃球隊齊心合力，以33:31勇挫由前港隊球員李偉倫執教嘅《東方日報》，繼1997年之後，再贏冠軍！
傳媒工作分秒必爭，工作量又大，但《蘋果》球員勝在夠齊心，經常相約放工後一齊練波，合拍度真係冇得頂。完第1節嗰陣雙方打成4:4後，《蘋果》第2節發力，速度同內線投射都交出水準，多次突破對手防線投籃得分，領先20:15完半場。
16年後再奪冠
不過，球隊第3節集中力稍稍下降，被對手打出一段9:0嘅攻勢，落後20:24，之後仲被拉開到21:28。面對逆境，《蘋果》球員依然臨危不亂，而且現場近百名球員家屬同員工亦不斷打氣，全隊喺第4節做好防守，令對手只入到3分，加上《蘋果》球員體力仲係好好，終於喺完場前13秒憑一次內投，反超前32:31，之後再入多個罰球，成功逆轉贏33:31，兼且粉碎對方嘅衞冕美夢！
《蘋果》相隔16年後，再度問鼎冠軍，當年功臣之一嘅平哥今屆仍然在陣，太太同兩個囝囝亦有到場支持，佢話：「兩次捧盃都一樣咁開心，特別自己係陣中唯一贏過兩次嘅隊員，好有意義。」唔少隊員完場後，帶埋冠軍獎牌同屋企人去做冬，相信呢個冬至過得特別sweet。
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24