財爺曾俊華幾年前領銜主演嘅「惡搞回魂夜」做攝青鬼，票房勁收，佢又試過畀「二撇雞」叫人講吓「如果我係財爺」會點使錢、亦曾正襟危坐叫大家就預算案發表意見。新一份財政預算案明年2月又殺到，鬍鬚曾今次都「動」起來，改以十集動畫、每集1分鐘嘅「財政博客」講解政府理財概念，唔知網民會有乜嘢反應？
博客主角叫Johnny，原本有「二撇雞」㗎，但鬍鬚曾下令Johnny要剃鬚，睇落後生啲，否則乜嘢概念都聽唔入耳。
期待被網民「招呼」
財爺09年都試過出漫畫，希望多啲年輕人關注預算案。但家吓睇漫畫嘅人比從前更少，人人都變低頭族，宣傳唔靠手機點掂先？財爺同事亦覺得唔好咁悶淨係叫人畀意見，費事變票房毒藥，反而應趁機教育市民政府係如何理財。
財爺個blog噚日宣佈推出十集《財政博客》嘅動漫短片，首集介紹財政儲備，由主角Johnny講吓點樣運用本身積蓄，請人食飯好，定係準備突如其來嘅醫療開支好，最後Johnny畀阿媽質問點解唔畀家用。論手法而言，的確好過政改三人組嘅「有商有量」囉。
之後幾集會介紹稅基狹窄、應使則使，量入為出嘅原則、又會講吓人口老化問題。齋睇牌面，似乎都係講吓點解政府唔使錢，右派概念甚濃。不過，鬍鬚曾話，因應終審法院裁決居港一年嘅香港居民有權申請綜援，明年嘅福利開支無可避免一定會增加。佢又話，今次佢毋須粉墨登場，但同樣期待推出嘅十條短片，會點被網民「招呼」。
mailto:[email protected]
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24