紐約人上周六主場迎戰灰熊，雖然教練活臣前一晚嚴令宵禁，要一班喜愛夜蒲嘅球員一齊留喺球場附近嘅酒店過夜，但對比賽都冇咩幫助；內線同籃板輸晒，就算有安東尼攻入全場最高30分，最後都係以87:95輸波，班主杜倫都睇到嘆晒氣。
紐約人球員住喺一個紙醉金迷嘅城市，成日去clubbing唔出奇。喜愛夜蒲查實唔係罪，但比賽前一晚都去就真係曳！上季季後賽紐約人首圈對塞爾特人，JR史密夫晚晚都去玩，歌手Rihanna仲大爆JR晚晚都飲到爛醉先走，第5戰前一晚，佢仲俾人影到佢攞住支酒「吹喇叭」，可見藍橙軍團紀律認真麻麻。
10點留酒店集宿
今季戰績咁差，似湊仔多過教波嘅活臣成日都俾班球員激到生蝦咁跳，而且隊波無復上季主場超強嘅狀態，所以佢今場對灰熊決定玩宵禁，講到明唔畀球員再出去夜蒲：「我哋有啲紀律問題，今晚（上周五晚）將會聚埋一齊。我唔會畀佢哋再出去蒲。」安東尼就爆話門禁令定喺10點鐘，仲話今次大家都會俾人𥄫到實，但係佢對宵禁成效就不置可否：「我哋之前已經試過喺主場比賽前一晚一齊喺酒店過夜，有陣時都會對表現有啲幫助。」
內線不力負灰熊
可惜，一班紐約兵就算乖乖留喺酒店，對灰熊場波都係打得一般；外圍手感麻麻，全場22次起手射3分中得6球。內線防守又差，俾灰熊喺鎖匙圈入面攻入60分！連籃板都輸埋，紐約人全場搶得29個籃板咁大把，足足少灰熊27個！主隊一度落後19分，安東尼第4節發力攻入全場30分中嘅12分都冇用，最後以8分之差輸波，主場至今戰績只得4勝10負，上季主場只輸10場嘅勇態已經一去不復返。
活臣今場知道對方一定狂攻內線，正選安排咗真達拿同巴蘭尼鎮守，賽後忍唔住點名批評佢哋：「今場已經特別預備咗個高大嘅內線陣容，咁都要輸，真係好鬼肉酸。我覺得真達拿、巴蘭尼同安東尼都要認真啲搶籃板，今場輸就係輸在呢一點。」紐約人班主杜倫今場都有入場睇波，完場鐘聲一響之後，嘆咗口氣就走咗。球隊喺聖誕節主場鬥雷霆，到時可能仲要嘆多幾口氣。
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24