本月中體育記者協會25周年慶典，有幸從霍啟剛會長手上接過紀念座，上面刻着「敬業12年」。眨吓眼，咁就入行12年，期間我們講波佬有何變化？
2000年，小弟未入行，當時行內主要講波佬十隻手指數晒。此前講波佬搜集資料，只靠日常報紙雜誌些少新聞，主要靠講者個人經驗，你問「阿叔」？「邊使上網㗎！」
04年歐國盃，開始有講波佬帶牛龜咁大部手提電腦講波，錄影廠亦有綿延數里的寬頻線。賭波合法化1年，多了馬會網站搵料，亦多了很多球彩新同事。
06年世界盃，發展到可以無線上網，但電腦未有內置wifi，要插個接收器；且技術差，可能得近router個講波佬收到，但足球網站已目不暇給；講波佬突然發現，很久已沒翻足球雜誌。
今日，講波佬枱上只剩下是一部小小tablet、甚至一部手機；衞星訊號故障，可從文字直播繼續得知戰況、還有apps提供實時統計數據，細緻如兩隊不同時段的前場傳球成功率也有。未來會否可「自選講波佬」？例如曼聯（圖）對阿仙奴，按白色制可聽「廠迷角度講波」；按紅色制則是「純曼主觀評述」，過癮嗎？
方柏翹
now足球評述員
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24