英超班霸曼聯嘅前鋒朗尼，自上季起外界一直對佢嘅前途揣測多多，日前就有報道指，西甲皇家馬德里對仲有18個月就同紅魔滿約嘅朗尼好有興趣，但就唔想咁貴收購佢，於是希望朗尼可以唔同曼聯續約住，咁就可以喺出年夏天平啲買朗尼。
曾用同一招搶奧雲
28歲嘅朗尼自從上季傳出同曼聯前主帥費格遜決裂之後，就一直傳佢可能離隊，就算今季曼聯轉咗由莫耶斯執教，呢啲傳聞都一直冇停過。鬼咩！朗尼同紅魔份約只係剩番18個月，只要呢名英格蘭國腳一日唔同紅魔續約，呢啲傳聞都唔會停。而據報皇馬會長佩雷斯亦好欣賞朗尼，仲想佢拖住唔好同曼聯續約，等到出年曼聯驚人財兩失嘅時候，可以用2,000萬鎊羅致朗尼。
其實，皇馬之前都用過呢一招，佩雷斯當年又係教唆前鋒奧雲唔好同利物浦續約，終於喺04年夏天可以以800萬鎊低價買到佢。究竟，今次朗尼會唔會步奧雲嘅後塵呢？我求大俠就要放長雙眼睇吓喇！不過，朗尼一向耳仔軟呢個係事實；講起奧雲，喺2011及12年，朗尼就係耳仔軟聽當時已經涉獵賽馬嘅奧雲講，以每匹身價由40幾萬鎊至60幾萬鎊不等，高價買入咗3匹賽馬，諗住可以喺賽馬場上叱咤風雲，點知淨係拉過一次頭馬咁大把。朗尼喺舊年將其一中匹叫做Tomway嘅賽馬以2,000鎊平賣咗之後，喺日前又決定將另外兩匹純種馬Pippy及Switcharooney退休，索性「冇眼屎乾淨盲」。
「攝石人」再現奧脫福
好彩，朗尼效力嘅曼聯最近表現有番啲起色，計埋啱啱喺上周六擊敗韋斯咸嘅聯賽，取得4連勝。唔知係咪因為咁，領隊莫耶斯心情唔錯，再次重現「攝石人」本色，喺上周六當一名小球迷喺曼聯主場出面影相時，啱啱行過嘅莫耶斯就突然對住鏡頭一笑，搶晒鏡！
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24