【銅鑼灣】現年47歲嘅朱麗倩同劉德華結婚5年，二人育有一女劉向蕙，近日頻頻傳出華仔再做老竇，雖然華仔直認心急造人，但一直未見有好消息傳出，日前華仔罕有咁拖實朱麗倩到廣州送別一代粵劇宗師紅線女，當時着住黑色絨褸同平底鞋嘅朱麗倩顯得肚凸凸，孕味十足。
買十幾袋禮物
近日華仔要四出為《風暴》做宣傳，所以朱麗倩亦有時間襯聖誕節前出動shopping，前晚約8點，只見華仔嘅兩部七人車停泊係銅鑼灣禮頓道附近，冇幾耐就見朱麗倩喺胞妹朱麗華同妹夫以及兩名保鑣陪同下出現，妹夫亦不時用手扶住朱麗倩，三名壯男都手持合共十幾個購物袋，估計係朱麗倩抽空選購聖誕禮物。
只見朱麗倩例牌戴上口罩，喺又鬆又闊嘅外褸之下都係睇唔到佢個身形，不過佢哋一行人警覺性好高，好快就見到傳媒拍照，未知朱麗倩係咪已經習慣咗俾人影，佢前晚表現大方，就連保鑣都表現友善，以往佢哋見記者都左閃右避，但前晚就冇避忌，保鑣只係叮囑記者影相時要小心，而朱麗倩臨上車時亦有望一望記者。
採訪、攝影：吳耀輝
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24