星期一有場英超重頭大戰，阿仙奴主場對車路士，焦點就係車仔左閘艾殊利高爾倒戈。不過，喺賽前記招上，車仔領隊摩連奴話，艾殊利高爾唔會喺呢場大戰踢正選：「佢只會係後備或者喺屋企。」唔通摩佬見佢早前參加阿仙奴聖誕party所以要雪佢？摩佬就話冇咁諗過，佢話自己只係領隊，唔係老竇，冇權限制球員嘅自由。上周五艾殊利高爾33歲生日，車路士送咗個蛋糕畀佢慶祝（上圖），但佢喺twitter話，最想拆禮物時，可以見到佢前妻喺禮物盒度彈出嚟，畀佢一個驚喜！至於車仔射手費蘭度托利斯（右圖）接受訪問，講到自己原來細個嘅目標係做門將，但因為一次撲救搞到甩咗幾隻牙，佢阿媽唔准佢再做門將！
另外，阿仙奴中場艾朗藍斯接受訪問，佢話細個如果唔揀踢足球，就一定去打欖球；被問到10年對史篤城斷腳嘅感受，藍斯感嘆：「嗰次係我感受過最痛嘅感覺！」佢話要成兩年，先可以克服陰影，搵番自信。
