賭王最索千金何超蓮不嬲觀音兵一籮籮，前晚背着在內地錄影音樂節目的男友吳克羣，與友人睇戲、深夜遊街，都不願歸家。超蓮前日下午5時多，率先與曾傳過緋聞的寰宇男模陳俊勰（Zenki）及一名女友人到圓方「三人行」睇戲，起初超蓮與Zenki保持距離，齊齊在售票處購票看劉德華的《風暴》時，就開始密密傾談，之後齊齊去小食部買汽水及芝士薯條，超蓮更闊佬埋單，作為電燈膽的女友人都識做地行開。超蓮睇完戲後發現在場有記者採訪，Zenki與女友人即匿在圓柱後，而超蓮禮貌地上前表示朋友們不願上鏡，三人齊齊行到機鐵站，送別女友人後，超蓮便與Zenki乘搭地鐵過中環，二人全程有傾有講，去到置地廣場分道揚鑣，超蓮則有朋友在七人車等候齊齊往食晚飯。
四人同飲一支水
超蓮可以說是越夜越精采，到了凌晨時分，換上英國品牌Markus Lupfer的龍蝦圖案衞衣潮服，與造型師好友馬天佑及兩名西裝褸打扮的男友人「一后三王」在大坑夜蒲，齊齊在7-11便利店門口傾偈講笑，四人同飲一支水。其中超蓮與馬天佑玩到動手動腳，互相拍打，馬更從後熊抱超蓮轉了一大圈，二人親暱行為儼如親密男女朋友，超蓮十分受落，更笑晒大聲叫：「唔好，好痛、好痛，放手。」在旁的兩名男友只顧狂笑，而馬天佑亦同其中一個男友擺出不文甫士影合照。四人在大坑街頭吹風吹水玩足15分鐘，才願上的士去灣仔趕下場。
採訪：朱志聰、羅德光、吳耀輝、梁繼光
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24