佳節前後，又係老朋友聚頭嘅好時候。好耐冇見的話，有時坐埋一枱你唔癡我未呆，就係唔知由邊頭開始講起比較好，我最近嗰餐比較直接，就由大家咁多年來嘅病歷開始傾。嘩，內容豐富過好多連續劇，慘情指數只係僅負於《On Call 36小時》。
呢啲聚會時候，就好依靠蘇亞雷斯嚟入波打救，嗱，每一班朋友之中總有一兩個蘇亞雷斯嘅，又或者係蘇亞雷斯身邊都總有一班剝花生嘅朋友。
蘇亞雷斯，就係嗰位有故事的人啦。當𠵱家球壇中人個個講數字時，佢帶畀你嘅係一個個故事，有不文有咬人，要乜有乜，咁你話佢嘅叫座力，點會唔高過乜都冇、剩係入波嘅阿古路吖！
朋友之中嘅蘇亞雷斯，通常以前都係百厭仔百厭妹，因為大家都係鍾意聽衰嘢多過聽好嘢。話之你以前有幾叻、讀書有幾醒，甚至出嚟做嘢有幾發、嫁得有幾好，大家最like嘅，始終都係聽衰嘢同醜事。而好奇怪嘅係，無論係幾衰幾差嘅往事，到當事人好多年後攞番出嚟講，都往往變咗好好笑嘅趣事。有笑匠講過，所有笑話原本都係一個個悲劇，不過由當事人自己講番出嚟就真係舒服晒，自我挖苦永遠都係建立自信嘅最好方法。
如果你係蘇亞雷斯嘅老死，幾個月之前坐埋一齊，或者你都唔知可以點樣安慰佢。喂，喺球場咬人喎，甚至你都可能驚俾佢咬埋一份。但係幾個月後呢，當佢有時間同你摸酒杯底的話，你又賀佢都賀唔切，人工加到笑，身價三級跳，又越過高山又越過谷，人生高低潮一浪接一浪，坐喺旁邊聽都隨時頂唔順；但係當事人本身繼續不停大笑，繼續嘲笑自己：「我都唔知伊雲洛域隻手臂有乜咁好食，可能當時太肚餓喇。今晚一人一隻燒鵝髀我嘅！」之後仲可能爆埋艾拉單嘢嘅來龍去脈㖭！
抄考費蛇嗰句，有難時你唔當佢係朋友，到佢紅咗仲使乜當你係老友吖！若果你身邊都有個蘇亞雷斯，𠵱家唔使賀佢住；到下年世界盃時，佢隊烏拉圭同英格蘭反面之後，你先搵佢講笑啦！
文：KEYMAN
now TV主持
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24