籌備加拍攝足足三年的3D魔幻動作電影《西遊記之大鬧天宮》，已定農曆年三十晚喺香港上映。部戲請咗好多中港台紅星演出，除甄子丹飾演美猴王外，仲有永遠親民嘅周潤發、郭富城、梁詠琪同陳喬恩等，部戲製作一直好保密，至前日兼任動作導演嘅子丹喺facebook放上一條長達四分幾鐘嘅製作花絮，48小時已經逾150萬次點擊率，認真巴閉！
美人魚活現
片段呈現好多震撼畫面，有雲端上的天宮、隕石墜落、巨浪沖岸、如意棒登天等逼真場面。仲請咗荷李活班底幫手搞特技化妝，當中有七、八十個造型，而2,400個鏡頭、即98%都係用藍布拍攝，之後再做後期特技加工，原本着藍色褲嘅張梓琳鏡頭一轉就化身美人魚身軀。子丹仲喺美國買咗個可以360度旋轉嘅環，突破以前吊威吔技術，可以自由做翻騰動作，飾演玉皇大帝嘅發哥都有機會展身手，搞到頭髮直豎嘅發哥喺訪問片段話：「我不是期待每一場戲，而是期待每個鏡頭。」
場主：守庫
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！