【隔牆對論】
終審法院裁定限制居港未滿七年新移民申領綜援違憲後，引起極大爭議。社工註冊局委員兼資深社署社工梁建雄樂見裁決，認為道德是政府政策的靈魂，助人不應問出處，新移民亦非全是呃福利大食懶，他說：「我唔認為綜援咁馨香，大家會去搶」。自由黨員李梓敬指新移民未有貢獻、先領福利，認為如此政策只會吸引弱勢新移民湧港，令納稅人辛苦累積到的財富，「拱手相讓畀佢哋攤大手板攞呢?」
記者：袁樂婷 朱雋穎
記：《蘋果》記者 梁：社工註冊局委員、資深社署社工梁建雄
記： 社會一面倒不滿終院判決結果，認為必定增加福利負擔，你怎樣看？
梁：所有社會政策都牽涉道德課題，綜援作為香港唯一一條安全線，理論上任何人「生活唔到」，都應該Give them a living，「唔可以硬生生用一個政策踢佢出門口就當見唔到」。以目前經濟環境，要應付有需要而又會來申請的人，這筆錢政府應付得起，道德上亦責無旁貸。終院判決是理性，五位法官一致認為政府理據不足以支持這個政策（七年限制），「唔係話政府冇權，但要有理據」。
在2003年，居港未滿七年人士仍可申領綜援，當年共有29萬宗綜援個案，居港未滿七年人士有4萬多宗，佔整體個案的13.9%。2004年對新移民「落閘」，新移民綜援戶減少，去年只有1.48萬宗，佔整體26.9萬戶個案的5.5%。
記： 現時新移民佔整體申領綜援比例只4.4%，但2004年「落閘」前，有關數字一直是雙位數。終院判決會否令歷史重演？
梁：2004年之前經歷很多大事，97年金融風暴、03年沙士，當時莫說是新移民，就算中產也有破產要去申領綜援。「數字係死嘅，與其話新移民依賴，其實可能因為佢哋係經濟環境差時最首當其衝嘅一群」。低下階層往往最快失業，但重建社會經濟通常由頂層開始。「佢哋未受惠於經濟復蘇時，唔攞綜援點生活？」
十年後的香港變了很多，可說是如日中天，政府富有得可以派錢，亦有最低工資，失業率只得三點幾，Perfect employment。「我唔認為綜援咁馨香，大家會去搶。𠵱家最大問題係政府容讓件事惡化」。
實施最低工資，基層工人的工資增加，有食肆用逾萬元請洗碗工、保安員月入過萬。60歲以下健全成年人的綜援標準金額則只是2,070元。
記：不少港人對新移民的印象是搶福利、呃綜援，你在前線的經驗是否如此？
梁：「唔知點解近年社會好撕裂，問題係我哋生活得唔開心，冇新電視睇，唔夠地方住，係咪真係因為新移民？」香港26萬綜援戶，大部份老弱傷殘，因失業而領綜援的健全人士不足5%，加上新移民，可能只會令5%變成6%。
「我哋要睇嘅係，綜援金額對新移民戶係咪真係咁吸引，值唔值得佢放棄尊嚴去呃？」現在有最低工資，做清潔最少時薪30元，每日做4小時，一個月做20日已經2,400元，標準綜援金額只得2,200元，「為乜先？」
「可能你話佢唔使做喎，我又見唔到好多人覺得賴死喺屋企攞綜援係好開心，因為咁多年嚟成個社會好齊心創造負面標籤，好多真係有需要嘅新移民死都唔願攞，我手頭上有唔少個案係寧願捱到抑鬱拎傷殘金，或者等屋企老人家拎長者生活津貼，都唔想畀人覺得係大食懶，尊嚴有價」。我不否認有人會濫用福利，但不一定是新移民，香港人都可以好懶。
記：現行綜援制度常遭詬病，如何改善？
梁：現在是採用信任機制，你報幾多（資產）就係幾多，政府只會間中抽查。要確保每分錢都用得其所，必須付出更多人力及金錢，例如以後每位申領綜援人士都要簽授權書，社署有專責同事，定期向銀行查紀錄。「如果你個閘落得咁勁，制度就冇咗人性」。
香港綜援制度是全世界最簡單，一律只給錢，應該想多些其他方法，尤其在幫受助人脫離綜援網上，做得很差。我會形容綜援似坐監，用2,200元困你在一個其實並不安穩的Comfort zone。「日日同老婆鬧交，個個月唔夠錢使，佢知㗎，但離開監牢嘅代價好大，唔好彩俾人炒咗，再申請綜援需要時間，中間幾個月點算呢？」綜援戶很難相信改變會令全家過得好些。最低工資有幫助，起碼值得博，但未夠。
參考美國，大多數州分的失業救濟金只給半年，之後就有配套幫受助人搵工。當尖沙嘴餐廳要用時薪80請一個外籍女士去洗碗，我們手頭大批個案冇工開。「佢哋未必日日做到八個鐘，如果老闆唔介意請多幾個人，每人輪流返四個鐘，佢哋好樂意用低啲價錢做」。
派社工跟老闆傾，時薪貴過一份綜援很多，要看政府是否願意投資，去幫一個人重歸就業市場，之後令他不用再依賴。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange