電影《喜愛夜蒲3》是非多多，前晚在圓方舉行首映禮，何佩瑜（Jeana）、「寸嘴Barbie」夏尉喻、郭穎兒（Celia K.）及一眾𡃁模抵冷「胸」群而出，反而女主角雨僑密實登場，當中Barbie的性感麥當娜look最性感，金色頭髮配粉紅色窩釘束胸裝，奇峯突出。
據知Barbie因每次宣傳都拋胸搶風頭，搞到監製伍健雄睇不過眼，已知會公關禁止Barbie接受傳媒訪問，就連之後Barbie出席after party時，伍健雄竟當着一眾投資者、林小明及Jeana等人面前連番呼喝她要「低調啲」，搞到Barbie勁冇癮，一見對方就掉頭走。據知Barbie已被禁止出席謝票活動及花車宣傳活動。本報昨致電伍健雄求證，他表示沒回應。
Jeana胸圍笠林德信
首映禮上，大會送內衣給演員做聖誕禮物，Jeana將胸圍放在林德信面上，又自爆二人已約定：「我哋講明睇套戲時，見到有親熱鏡頭就鬥㩒對方，等大家唔好尷尬。」記者笑這樣會令林德信的女友呷醋，Jeana即反應甚大說：「吓？女朋友？戲裏面呀？」當得知所指是松岡李那，Jeana說：「工作啫，我唔會搞人男友！」對於有女演員指太緊張發噩夢，Jeana說：「我就發綺夢，有乜鬼噩夢好發！」而Celia狂呻因之前師姐陳靜辭演鬧出風波，令她好像也受劇組歧視，就連之前的宣傳活動也沒被邀請，令她十分不開心。
採訪：楊潔雯
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！