全港學界精英籃球賽上屆男子組冠軍元朗遵理放棄衞冕，今屆捧盃大熱就落喺男拔萃身上，呢支應屆九龍區D1盟主噚日喺葵興林士德體育館舉行嘅次圈，以67:42輕取可譽，殺入8強對沙田書院。中六生蔡再懃（圖）只打第1同第3節，已經射入全場最多嘅15分。呢位6呎高嘅得分後衞速度快、投籃準，難怪中四由觀塘功樂轉到男拔萃後，深受重用，佢話：「嚟緊甲一新球季，都會為『升班馬』晉龍效力，長遠目標除咗入到大學，仲希望代表港隊打比賽。」
女子組就有離奇事件，沙田書院因為大部份球員去外國度假同探親而棄權，「牛下女車神」李慧詩嘅母校梁式芝不戰而勝，晉級8強。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange