意想不到劉德華會主動解構「富二代」的組成─《天機：富春山居圖》、《不二神探》及《小時代》，被內地網民喻為當世三大爛片。偏見來自先入為主，原以為會是一場零和訪問，但見他講起跟新導演的合作有板有眼，對14巴港女的新聞如數家珍，曲線提起跟他有過節、麥浚龍位富爸爸麥紹棠，華仔都是心如止水，就知很多時都是皇帝唔急，反而是太監還急。
撰文：何永寧
劉德華日前接受本報訪問，為電影《風暴》宣傳，《風》片被形容為去年華語片賣座冠軍《寒戰》的延續，前日《風》在港上映，首日開畫票房有167萬元，加上早前的優先場，票房合共約240萬元，內地上映8日已過2.2億人民幣。華仔視《風》為警察電影的三部曲，緣於99年他見講警察的電影相對較少：「嗰時我同老闆江志強先生講，香港電影應該講番多啲警察，所以有之後嘅《大追捕》，到舊年嘅《寒戰》，《風暴》係第三部曲。除咗講人性，仲想講感情，帶出每人內心都有大大小小一場風暴，戲中嘅我、家棟，甚至胡軍同呂良偉都有。」
用心演爛片
跟新導演袁錦麟合作，華仔坦言：「袁錦麟參與過好多劇本創作，導演係第一次。同新導演合作要好小心，更加保護。好似同阿杜（杜琪峯）拍戲，喺片場都鬧嚟鬧去，嘈完第二日大家都冇嘢。同新導演就唔同，你講完一句，覺得語氣重咗，第二日你要同佢say sorry，唔好等現場啲人覺得『咦，你鬧得，我都鬧得啦』。」
華仔自言每次拍片都覺得是最好：「以為拍好啲拍貴啲就會收得，事實未必係咁，《91神鵰》拍咗五千萬已證明到。之前我去金馬獎，睇番自己三部戲，分開睇明明好好，但同一日睇番三套，又唔係好好咋噃。成日話演戲由心而發，到今時今日我都仲摸索緊。」話題一轉華仔忽然反問：「你知唔知乜嘢叫『富二代』？係啲網民話今年三套爛片──《天機：富春山居圖》、《不二神探》同《小時代》，每部戲都好用心演，演嘅時候覺得好好，大家唔鍾意都冇辦法。」
有事實根據
近年合拍電影題材多樣化，華仔說：「啲人話合拍片唔好睇，《桃姐》、《寒戰》咪合拍片，好似阿杜、老爺（徐克）、爾冬陞都摸到門徑，拍到貼近時事有港片味道嘅戲。」他認為電影人最重要貼近社會，又提到網絡大熱的14巴港女：「如果以前拍電影講個男友俾女友當街摑14巴，你實會話『拍戲啫，邊會咁』，嗱，𠵱家話你知係真嘅。你又梗唔信啲警察入屋捉賊，好多時都係伸支槍入去亂開，我睇外國嘅警匪實錄，外國差人都係瞇埋眼就開槍。」
華仔向來提攜新導演，近年有指港片復蘇，新導演輩有黃修平的《狂舞派》、麥浚龍的《殭屍》，他笑說：「有新導演出頭對香港電影當然好，不過如果我話睇過一部，冇睇另一部好似就唔係幾好，你知我同麥浚龍爹哋嘅事。」但他也大方評價：「兩個都係好導演，拍得好，麥浚龍我一早話過佢唔錯。」
老點林家棟
作為《風暴》主角之一的林家棟，坦言經常被老闆華仔提醒：「老闆成日同我講『你主角嚟㗎，唔好成日當自己下線』，因為佢做兵我做賊，成日不自覺心虛，搞到眼神好鬼祟。老闆要我將做賊變成理所當然，大家應該對等。」與華仔合作多年，家棟說：「由《愛君如夢》到《無間道》，每次都係俾佢點。今次佢為咗場凌空喺兩層樓之間嘅搏鬥戲，要我練咗幾個月巴西柔術，就為咗一分鐘嘅對打。」他坦言要數「點」得最厲害，是《無間道》的卧底匪徒角色：「嗰次點得我透，佢同劉偉強專登為我寫另一個假劇本話我係差人，到結尾場戲先畀個真劇本我，同我講『你係卧底』。」今趟在《風》片，家棟全力負責愛情線，平衡很重的火藥味，他說：「同姚晨嗰部份係全套戲嘅感情位，同時探討法律嘅灰色地帶。」
服裝：Paul Smith（劉德華）
場地：馬哥孛羅香港酒店
戲裡戲外，話題最強，立即收睇《動戲場》:
http://hk.movies.nextmedia.com/extra/list/