【中環】58歲武打明星劉家輝，兩年前因為中風導致半身不遂，加上跟前助手發生金錢糾紛，以及與妻兒關係決裂，令他飽受打擊。幸好劉家輝身邊還有一班朋友不離不棄，據悉王喜及邵音音知道劉家輝生活有困難，先後給他零用錢，至於樊亦敏為他打點生活及處理官司外，昨日又偕大班友人陪坐輪椅的劉家輝到中環檢查身體，有情有義，誰說戲子無情！
劉家輝因為中風導致半身不遂，經過兩年治療已逐漸康復，體重由當初110磅回升至120磅。近日家輝更頻頻出動，相約友人飲茶，不過，由於他行動不便，出入要坐輪椅，為此每次外出都要人相陪照顧。昨日家輝到中環作身體檢查，除了好友樊亦敏外，還有4名男女友人傍實，男的負責抱家輝上落樓梯，女的則搬輪椅，相當大陣仗。
樊亦敏打點生活
昨日上午10時許，家輝乘七人車抵達中環，友人抱他落車後再抱他坐上輪椅，繼而會合樊亦敏一起到畢打行。見家輝精神尚算不俗，由於近日天氣寒冷，家輝穿上厚厚衣服及戴上帽子外，樊亦敏更預備了一條毛氈披在家輝膝上。不過，一行人陪家輝上畢打行後，始發現去錯地方，結果又再擾攘一輪才抵達中建大廈的醫療健康中心，最後逗留至下午1時許離開。
家輝出事以來，既要面對跟前助手的金錢糾紛，加上與太太及子女關係缺裂，令他飽受打擊。猶幸家輝好友對他不離不棄，除樊亦敏為他打點生活及處理官司，而據知王喜及邵音音，早前探望家輝時更有給他零用錢，王喜昨接受電話訪問，問到給零用錢家輝時，他說：「呢啲隨心㗎啫，唔係啲乜嘢嚟。上次見佢都精神嘅，可以自己用食具進食，講到嘢，溝通到。」有指家輝要應付生活開支及護老院住院費等龐大開支，要變賣中環物業，王喜說：「上次飲茶都知佢需要用錢，但佢財政安排就交咗律師處理，係咪賣樓我就唔多清楚。」記者昨曾致電樊亦敏，但她表示不便接受訪問。
惠英紅託人問候
近日有消息指家輝因要變賣中環物業，而向入住該物業的一對子女逼遷，但家輝身邊友人昨向本報反擊說：「乜嘢叫逼遷呢？層樓係家輝個名，喺5樓嚟，又冇電梯，家輝根本返唔到去住！家輝係有責任養仔女，但佢𠵱家一個傷殘人士，佢兩個仔女都咁大，點解仲要家輝養？點解關晒家輝事？佢老婆呢？家輝同佢前助手單官司，佢老婆有冇出過半句聲？我唔知家輝係咪要賣樓，但啲錢係佢辛辛苦苦賺番嚟，層樓係屬於佢。如果關心家輝，係咪應該為家輝長遠生活打算一下呢！」
昔日跟家輝合作無間的惠英紅，十分關注他的健康狀況，可惜未有機會探望，她昨在電話中說：「佢有個list㗎，唔係人人可以探，我都係透過演藝人協會嘅人先知佢嘅近況，只能託人問候。」
採訪、攝影：方圓、楊浩賢、徐錦池
戲裡戲外，話題最強，立即收睇《動戲場》:
http://hk.movies.nextmedia.com/extra/list/