【中環】已故巨星張國榮（哥哥）走咗10年，摯愛唐鶴德依然對哥哥念念不忘，之前佢仲現身出席悼念活動，哥哥4月1日死忌當晚，唐唐更到紅館出席哥哥悼念晚會，親自鞠躬答謝哥迷對哥哥嘅愛護，當時唐唐個樣有啲憔悴，似乎呢段日子令佢再次勾起失去一生摯愛嘅傷痛。
體貼開車門
轉眼過咗8個月，唐唐嘅心情再平復落嚟，深居簡出嘅佢前晚終於再現身，約咗一男一女長輩友人到中環歌賦街嘅Gough 40餐廳食飯，大約夜晚近11點，司機駕駛保時捷到達門口，唐唐帶頭步出食肆，佢好體貼咁幫兩位長輩開車門，安頓好佢哋坐上後座，之後唐唐先坐上司機旁邊嘅座位。
雖然人到中年，着黑色大褸嘅唐唐依然靚仔有型，身形同外表都保持得好好，其間記者上前影相，唐唐刻意側面避鏡頭，保持一貫低調作風，但態度友善，唐唐吩咐司機開車離去，之後唐唐座駕向灣仔方向駛去。
採訪、攝影：潘冠恩、黃曉程
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！