有意借用英冠昆士柏流浪前鋒安祖莊臣（AJ）同捷雲頓，備戰亞冠盃附加賽嘅南華，噚日友賽太陽飛馬，雖然兩位英冠兵仲未到，但陣中都有位前波斯尼亞國腳卡古要睇辦，可惜隊友供應唔多下，表現只屬一般。南華憑韋爾先開紀錄，但最終被飛馬鄧景煌易邊後扳平1:1完場。
南華教練張寶春賽後話卡古未在狀態，但就耍太極話唔清楚係咪有英冠兵來投︰「要開會先知喎……其實現今足球講求配合，球隊唔係單靠一個英冠水平球員，如果其餘10個球員唔得，搵C朗嚟都冇用，關鍵係要提升整體能力。」至於飛馬早前指有代表過澳洲踢世界盃嘅球員加盟，但教練陳志康噚日話，嗰位球員除咗人工高外，仲有好多生活上嘅要求，球會未必負擔得起，反而陣中嘅前澳洲小國腳馬高積錫表現都唔錯，加盟機會唔細。
另外，近期負面消息不絕嘅榜尾隊愉園，今日兩點半喺大埔運動場迎戰傑志嘅甲組波，守衞楊賜麟賽前承認隊內氣氛麻麻地，但相信球員會盡全力踢好今年最後一場波。至於榜首傑志當然想以贏波慶祝聖誕同新年，不過，暫代教練之一朱志光講明，球隊冇條件輕敵，所以一定要打醒十二分精神，以保住個領先優勢。門票分正價$60同$20長者及學生飛兩種。
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24