上季玩完馬後炮，今季就做預言家，同大家一齊睇吓嚟緊周末有咩好睇 。今周傾咩：領隊唔對路就要炒？
11/12球季開季，阿仙奴領隊雲格曾經成為廠迷箭靶（我承認我也有份鬧佢），先後輸畀利物浦同熱刺，唔夠醜？整多場輸畀曼聯2:8畀你睇，雲格當時猶如過街老鼠，及至季尾壓過熱刺，勉強保住前四，先令廠迷收聲。我唔知如果當時阿仙奴已經炒咗雲格，球隊最終命運會係點，但今季主場擊敗熱刺後，阿聯酋球場再度傳來球迷歌頌雲格嘅歌聲。
完成第16周聯賽，英超再有兩位領隊被炒，就係熱刺嘅波亞斯同西布朗嘅奇勒；先講奇勒，佢就真係最無辜，以佢哋班底根本就係護級分子，上季有盧卡古連番爆seed，竟然去到第8位，球會一心以為今季再進一步，講真冇咗呢個新魔獸，西布朗即時打回原形，𠵱家連奇勒都炒埋，西布朗準備護級啦！
熱刺炒波亞斯仲搞笑，踢完第16周，熱刺雖然排第7，但都仲多過曼聯兩分，點解波亞斯會早死過莫耶斯？無可否認對曼城同利物浦吞11蛋，係幾肉酸嘅戰績，但熱刺嘅結構問題係同類型翼鋒過多，但個別位置如正前鋒、中堅嚴重不足。熱刺係英超較早推行歐陸化管理球隊之一，領隊工作有別於傳統英超球隊，買賣球員話事權係由技術總監專責，𠵱家熱刺嘅技術總監就係巴甸尼。
大家都取笑May姐，其實May姐都好無奈，因為公司一定要佢餐餐用雞汁；正如波亞斯，熱刺賣巴利收到1億鎊，卡甸尼使凸1千萬鎊，結果買咗咩人？淨係識入12碼嘅蘇爾達杜，對英超陌生嘅伊天卡普爾同拉美拿，廚房淨係得呢啲材料，你叫波仔點煮好餸。 文：牽牛
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24