工展會開鑼後，日日人頭湧湧提前辦年貨，噚日民建聯一眾立法會議員就拉隊去撐場。八方記得上年民記逛工展會，「元秋」蔣麗芸一口氣掃咗成10個煲，今年佢未入場已經有目標，話老公鍾意食麵，所以會買部新出嘅製麵機，將麵粉、水、雞蛋全部放入部機，唔使五分鐘就壓出麵條，原來係想用愛心麵箍住老公！EQ葛珮帆就心大心細，擔心機製嘅麵條唔夠彈牙，即場煮嚟食完先決定。
黨主席譚耀宗仲叫埋太太出馬掃平貨，除咗同元秋一樣買咗部製麵機，仲掃走成車湯包，唔知係想滋潤定係補身呢？至於黨團召集人葉國謙就搶購蒸氣熨斗，似乎係想啲衫同黨員一樣咁貼貼服服。
足本收睇《亂噏24》x DADA陳靜；跟住有嘉玲姐駕到！
周一至周五《亂噏24》約定你： http://bit.ly/appletalk24